"Gouvèrnman i di Vergès : non !". Sa lété marké dann in zournal nana byin lontan, l’ané 2009. Lo vinn troi novanm, si mi tronp pa. Kissa i ansouvyin ankor ? Pèrsone i ansouvyin pi... mé sak lo moun i koné, sé k’té i falé fé kapote lo prozé tram-train. Mé pou kossa té i falé fé kapote projé-la ? Pèrsone i koné pa tro o-zis lo vré rézon.
Zordi ankor, l’ané 2025, bann z’istoryin la pankor démélé lo vré rézon an parmi sak radyo trotoir té i kolport d’issi d’la-ba. Pou in pé, zéléksyon rézyonal té i tonm kat moi apré é Vergès lété kandida, donk té i falé fé pèrde ali. Mé rézon-la i aparète in pé ridikil, vi k’Vergès la gingn zéléksyon-la kan mèm. Na d’ote moun té i di, inn-dé gro zoizo l’avé kalkil zot lété riskab pèrd la vant kat san mil voitir. Lé vré k’dan in Rényon in milyon d’abitan, armète ui san mil loto pou roulé... anfin, pa pou roulé... plito pou ète tassé inn-déssi l’ote in pé partou, sa té i roprézant la monaye... Donk, sa ossi i doi pa z’ète in vré rézon. Nana ankor inn-dé i di sé pars l’Eta té i doi tro larzan, mé sa té i anspèsh pa gouvèrnman anprété... étsétéra, étsétéra, la ké lo ra.
Nana in pist pou ésploré... é sé in l’ansyin prézidan la Frans té i apèl Sarkozy la rouvèr in sis novanm 2009, solon moin. Li la di la Frans i konpran pa bann problèm l’outre-mèr. Boudikont, sa lé riskab ète lo bon rézon ! Bon ! Alé, mon bann dalon ! Moin l’ariv mon l’androi, mi dsann, talèr ni artrouv dann tram-train, byin antandi !

Justin