Pardon éskiz ! Mi antan solman demoun i parl lésans, gazoil, le gaz é mi konpran bien pou kossa. Sa i kout si tèlman shèr, épi sa i aplati si tan tèlman nout port-moné. San konté k’in pé, bann pétrolié, i tir anou o flan, vèy pa koman. Parl pa zot manièr insolan pou narg bann konsomatèr kan zot i di Pèrnoèl i pas pa in promié désanm !

Sa ni koné sa ! Pou nou, bann ti kolon, sa lé bien vré. Mé pou bann moun l’apré ésploit anou, moin lé pa sir sa lé vré... moin lé mèm sir sé le kontrèr. Sa la pa in ségré ! Pèrnoèl i pass toultan pou zot. Kan le pri i goumant an gro, zot profi i goumant an détay. Kan le pri i diminié an gro, zot i fé tout sak i fo pou k’zot profi i diminié pa.

Koman-koman, zot lé asiz déssi zot valiz larzan.

I prétan dir, la-ba dann Lamérik, in pé la invant in kalité boison, pèrsone i koné pa ébzakteman la konpozision. I paré mèm lé pa possib fé in n’afèr parèy... sa in ségré d’fabrikasion. Issi, nou néna in bon pé ségré ! Pa nou, mé bann gran vaza... Par koman i form bann pri, pou nou Rénioné ? Lé jis, lé pa jis ? Ni koné pa.
Pars lo sèl zafèr k’i demann anou, sé péyé épi fèrm nout také ! Péyé é di mèrsi si nou la niabou ranpli nout bouzaron* sansa nout rézèrvoir lésans ;

 Justin 

* pou bann vié kréol, bouzaron sé le vant.