Oté néna in nafèr ké mi ariv pa a dizéré ankor zordi, fransh vérité li désann pa, li rèss kalé dan mon gozié konm i di, sé so légalité réèl ké lo prézidan hollande la promèt a nou po 2020. Si mwin la byin konpri, sa i vé di ké nou lé fransé ségonn zon dopi 1946. Sa i vé dir dopi la lwa di 19 mars 1946, dopi tan la ni dovré èt fransé réèl, boudikont nou lé fransé pa réèl, i konsidèr a nou konm zanfan batar ? Zordi swasant diz an apré, anfin i rokonèt a nou lo drwa légalité réèl ?

An so moman, mi poz a mwin in bon pé késtyon si so légalité la. Dopi lo tan ni di sa, lé vré pou vréman nou lé pa égal, argard in pé partou, dan tout dominn nou lé pa égal èk déor, la lis lé long, kiswa dan nout dévlopman, kiswa dan nout lékol, sirtou linivérsité, kiswa dann travay. In késtyon sirtou i rovwyin. Si dopi 1946 nou lé pa égal i vé dir ké ni pé réklam nout di ? Si ni romont an aryèr, si ni romont dopi swasant diz an i dwa a nou in ta èk in paké, nou na lo dwa domand in réparasyion tousala ?

Konm nout prézidan i koz pou lo légalité, déza mi trouv lé byin, li rokoné o mwin mandoné nou la kal si bor shomin, mé i fo pa li lé konm in boug i di éfas sak néna dann karné ousinonsa déshir lo karné plito, fé konm si na pwin ryin déryèr, boudikont pass sa an pèrt é profi, nonva i gingn pa fé konm sa mosié lo prézidan, néna trod rotar, néna tro larzan an zé déryèr. Sanm pou mwin, i fo ni fé inn apré lot, pou byin fé i fo pèy déza sak i dwa a nou, apré pou lo légalité réèl na war plitar !