In batay nou la vienbou débouzé. La gèr la pa fini, mé tilanp tilanp, batay par batay, n’a niabou palanké sistèm-là. Yèr, san ralépousé, bann prézidan zasosiasion i batay po lanploi dan lékonomi solidèr la gingn in gran nouvèl. Afors pèz si la ké, anfin banna la konpri i fo pèy demoun. Dizon, po linstan nana po pèy in moi travay. "La pa douz moi", inn i fé sort la romark.

Oté ! pèy travay-là, done ali son larzan mérité, kinm la pa bonpé. Loiyé aou, delo aou, kouran aou. Larzan i trouv pa désou rosh. Demoun i manz pa galé. Arèt zigil bann kaniki. Arèt pèz si zot moral. Trouv in solision vitman kisoi po CES, CEC, kisoi po bann CAE.

"A oui", la di Tantine Zaza, "bann ti i soutien bann gro, bann gro i soutien bann gro, alor moin mi voi pa kisa i soutien bann ti". Ankor éré Jean-Hugues Ratenon la mèt ansanm, èk tout bann prézidan konsèrné. É po tout sat la kozé, zordi lé lèr : fé !

Justin