Oté

« Pèz dsi la ké pou oir si la tète i bouj »

In kozman pou la rout

Justin / 11 out 2020

JPEG - 43.6 ko

Médam zé Mésyé, la sosyété, koz èk moin sé koz èk in kouyon, mé sé o pyé d’lo mir k’i oi lo vré mason. Mézami, sa i fé lontan nou la pankor anparl provèrb-la mé répète in pé tazantan, i fé pa d’tor solon moin. Sirtou kan in kozman konmsa i kol bien avèk la vi dann sosyété. Akoz ? Sinploman pars lo moun, i yèm konète. Pou kosa ? Mi koné pa. Kèl lintéré zot néna ? M koné pa non pli. Zot i késtyone aou pou fé koz aou kisoi dsi in n’afèr zot i pans ou la fé, kisoi dsi in n’afèr in n’ot la fé ézot i pans ou i pé konète. Si ou i méfyé pa ou i tonm dann pano é kan ou i rann aou kont, tro tar : ou la fine vann a ou, sansa ou la fine vann in moun ou i koné. Dé foi, mi yèmré di avèk zot in parol mi yèm bien é i di konmsa : « La lang sé lo méyèr zafèr, mé i ariv ké sé lo pli pir ». Alé ! Mi kite azot rofléshi la dsi é sirtou méfyé bann késtyonèr. Ni artrouv pli d’van. Sipétadyé.