Sa in kozman nana bopé d’moun i ansèrv de sa zordi ankor. Sans prop ? Nana désèrtin bébète, ou na l’inprésyon zot lé mor é kan ou i toush azot, zot i mète a bouz-bouzé épi zot ifilosh dovan ou. Moin la fine oir bann lézar fé sa, sansa bann koulèv i sava sansa i sort shanj de po. Nou na poin pou fé in shapite la dsi ! Mé sans figiré, sé in n’ot afèr : na demoun i kash la vérité, mèm si demoun i pans sé zot ké la fé in n’afèr a n’pa fèr. Lèrla, pou débisk azot, désèrtin i lans in fraz anlèr. La plipar d’moun i konpran pa lo sans, touléka i réazi pa. Mé sak la fé l’afèr, i konpran bien kisa lé vizé. Aprésa son réaksyon i pé dézign ali konm koupab sof si li lé pou arien la-dan, sansa si li réazi pa ditou pars li pé fé konm lo dsi fèye sonz si li lébien abityé. Alé ! Mi éstop la mèm, mi lès azot kass z’ot tète la dsi é ni artrouv pli dvan sipétadyé.