Oté

« Pèz dsi la ké pou oir si la tète i bouz »

In kozman pou la rout

Justin / 12 mars 2018

JPEG - 43.6 ko

Kosa sa i pé z’ète ? I pé z’ète in zangiye, sansa in kong, sansa mèm in koulèv. Ou i pé kroir li lé mor, mé ou lé pa sir pou vréman. Sé l’èr ou i aplik lo konsign lé dann kozman marké an-o la : ou i pèz dsi la ké, é si la tète i bouz ou i pé tir out konklizyon. Si la tète i bouz pa, ou pé tir out konklizyon galman-pa lo mèm bien antandi. Mé konm nou la fine di kozman-la sé in provèrb é li la pa bézoin ni la ké, ni la tète pou an avoir in sans. Kèl sans ? Sinploman si ou i vé konète in n’afèr, ou i pé poz in késtyon par raport in n’afèr ou i vé konète. Sansa ou i koné mé ou i vé demoun i konfirm aou lo z’afèr. Sé l’èr-la, la pèrsone i pé dir avèk ou kozman moin la mark anlèr la konm pou di : « Ou i dovine in n’afèr, mé ou i vé antann sa par mon boush… Kont dési mé fyé pa tro. ». Alé ! Mi lèss azot rofléshi la dsi kansréti pou évite tonm dann pyèz é ni artrouv pli d’van sipétadyé.