Souvan dé foi lé difisil konète la vérité dann in n’afèr. Sirtou si ou i antropran lo prézimé koupab pars prézimé-la, li lé for souvan dé foi pou kashyète la vérité. Mi pé dir azot in kékshoz la spass dann nout famiy é dopi tan-la-nou lété ankor lékol, tan-la !-ni koné kosa la éspasé, mé kisa la fé sa ni koné pa. In tan nout famiy l’arès la kaz in moun-nou lété lokatèr par l’fète. Dann la kour-la l’avé in pui, épi i bar d’pui. In zour nou la trouv lo bar kasé. Mé kisa la kasé ? Ni koné pa é zordi ankor ni koné pa. Pèz dsi la ké ou ! Rakont lo fo pou an avoir lo vé ou ! La poin arien pou fé. Mé ni koné dann désèrtènn zafèr demoun malin i nyabou trouv la vérité. In zour in madam té rotrouvé mor é lo kriminèl téi aksèp pa di in pti bout la vérité. In vyé polisyé la di ali : « Ou lé drolman for pou port kadav fam-la dopi landroi èl lé mor ziska son boutik ! ». Lo marmaye la di : « Non ! Moin la pa port ali moin, moin la pous son kor dann bourète ! ». Tro tar ! La pèz dsi la ké é la tète la bouzé . La di lo fo pou konète lo vré. Alé ! Mi kite azot pou rofléshi la dsi é ni artrouv pli d’van. Sipétadyé !