Kozman-la, na in sans prop épi in sans figiré. In sans prop ? Kan ou i trouv in koulèv alonzé dann zèrb. Soi li dor, soi li lé mor. Si ou i mète lo pyé dsi son tète, si li bouj pi li lé mor, si li bouj li lé ankor vivan… Astèr alon oir lo sans figiré. In moun i pé an avoir fé in n’afèr, pétète li la pa fé. Donk, sak i vé konète la vérité, i amors la pèrsone avèk in késtyon, sansa par in parabol, épi i gard lo réaksyon.

Si sa i fé dsi lo moun konm dolo dsi la plime kanar, lo boug la pa fé arien. Si li nana in n’afèr pou kashyète, kisoi par son répons, kisoi par mouvman son figir, ébin va débisk ali. Sé sa « pèz dsi la tète, pou oir si la kéi bouj ». Sa i di azot kékshoz ? Arien ditou ? Zot lé pa dakor ? Kalkil bien, fé travay z’ot koko é zot va oir si rant-rant ni tonm pa, kékfoi, dakor rantre nou.