Mézami, sa i fé lontan nou la pankor anparl provèrb-la mé répète in pé tazantan, i fé pa d’tor solon mwin. Sirtou kan in kozman konmsa i kol bien avèk la vi dann sosyété. Akoze ? Sinploman pars lo moune, i yème konète. Pou kossa ? Mi koné pa. Kèl lintéré zot néna ? M koné pa non pli. Mé fransh vérité lo moune i yème konète é kan l’ariv in n’afère oila zot parti, déguizé an polissié marron.

Mé avan konprann lo fon la panssé d’moune, ni pé apréssyé lo zimaz : sète in koulèv sansa in zanguylle, kong épi toute sorte zanimo konmsa : i dor osinonsa lé mor ? Si lé mor, lé mor é li la pi pou bouzé. Si li dor ébin li lé riskab bouzé.

Mé bouzé pou kossa ? Pou konète si ou lé in pé o kouran, si sé pa ou la fé lo mové kou par azar, sansa si ou lé pa o kouran. Si wi koné pa pliss dsi in n’afèr soidizan wi koné pa arien. In késtyon pozé san an avoir l’ère, é oute réponss, sansa oute réakssyon lé riskab mète demoune la puss a l’orèye. Fé dire azot sa léloush é kossa sa i kashyète.

Alé ! Mi kite azot rofléshi la dsi é sirtou méfyé bande késtyonère é ni artrouv pli d’van. Sipétadyé.