Médam zé Méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami zot i koné koman piman lé for ? Sirtou koméla néna inn – dé piman i sorte déor, ébin pou poiké konte dsi li. O fète, zot i koné la fors piman néna son l’inité d’mézir i apèl inité scoville é sa i sava ziska dë milyon. Afors piman lé for, momandoné si ou la mète sa dann oute kari, plito zète ali ké manzé. Sof pétète si ou lé shanpion an parmi bande manzèr piman- mé si ou lé normal wi zète oute kari.

Mé mon kozman i anparl pa la fors piman-sa sé in konparézon pou dir demoune i pé ète for, sansa fé lo for, mé li va trouve son mètr. Konm i di : « For an for, va trouv son mètr ». I paré Tayson té for mèm ziska ké son shomin la kroiz sète Evander Holyfield. Ala lo CQFD (sak téi fo démontré).

Alé ! Mi kite azot rofléshi la dsi é ni artrouv pli d’van. Sipétadyé.

NB. Késtyon bète : kèl sé lo kalou é kèl sé lo pilon ?