Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

« Pinèz la pik aou-la, sa pinèz out li mèm sa ! »

In kozman pou la rout

samdi 31 octob 2020, sanm Justin

Si ou lé jenn, mi pans pa wi koné pinèz pars koméla sa lé rar pou vréman. Lontan té in n’afèr l’avé partou, dann tout li, épi dann tout matla d’moun. Si tèlman demoun téi mète souvan dé foi zot matla dann solèye. Mé mi souvien pi si lété éfikass konm médikaman pars mi rapèl d’apré moin l’avé mèm. Ete piké par pinèz, sa mi rapèl pi. Sak mi rapèl sé son l’odèr épi in kozman moin la antann dir dsi kotomili, in moun l’avé di li lété bon mèm, li l’avé in bon pti gou d’pinèz. Vré, pa vré ? Mi koné pa… Sof ké mi yèm pa tèlman so zépiss-la.. Mé la pa tousa, nou lé dann in provèrb-la é sète-la mi oi li lé vré. Si néna kékshoz sansa kèlk’in l’apré ravaz aou, ou i pé rode loin, mé san trouvé, mé pli pré d’où ou lé sir trouv ali. Alé ! Mi kite azot rofléshi la dsi é ni rotrouv pli d’van. Sipétadyé.



Inn modékri, inn ti lavi, inn komantèr ?

signaler contenu


Facebook Twitter Linkedin Google plus