Nana z’animo na in l’éspès l’instin in kroyab. Sé komsi zot i koné i fo zot i fé antansyon pa mète dann danzé z’ot désandans. Sé lo ka d’pintad ! Dizon ou i anapr ali ziska l’èr pou ponn épi ou i larg ali : li fons, li fons, li fons. Droit dann son ni ? Pa ditou kan li ariv koté son ni li fé in gran détour épi li rant pou ponn par in rouvèrtir a pène si lé vizib. Kan li sort, li sava dsin bite o moins trant mète distans épi li shant, li fé : So-krat, So-krat-So krat ! Si ou la pa pli malin ké li, ou i trap pa son zèf. In lésonn sazès in z’animo i égzis dopi lontan. La sazès sa lé touzour bon pou pran. Alé ! Ni artrouv pli d’van.