Vin désanm 1848, la aboli lésklavaz la Rényon. Zot i koné z’ésklav l’avé poin lo nom, arienk in prénom, té i falé trouv shakinn in nom. Té pa fasil, vik dann tan-la lavé ankor soisant-dé mil moun ésklav... Zot i oi lo kas-tète kréol pou trouv lo nom !

I paré bann prodiktèr site intèrnèt na difikilté pou trouv lo kode an sifizans pou donn demoun. Sé pou rézon, tout kode i arsanm inn-a-l’ot in pé tro ; lé konm k’i diré tro fasil pou débisk in site demoune. Dé foi, ou i mète lo prénom, épi in poin, épi lo nom, aprésa in lète bizar, épi zot i koné la suite. Partou i fé sa !

Partou ? Pa toultan mon fra ! Dé foi lé in pé diféran : in moun la-ba dan la Frans la gingn in drol sirpriz : la sosyété Orange la anvoy ali in drol kod : salarab.com <http://salarab.com> .
Mi pans lo boug la fé kode-la, la byin fé ri son boush. Mé sak la gingn lo kode la pa ri ditou. Li la fé in prossé épi, a s’ki paré, la sosyété té kondané.

Alor, dé foi k’in fournissèr La Rényon na difikilté pou trouv in kode, pou moin mi pé souf ali dann zorèy inn-dé kode k’i plé amoin byin. Dizon, bann kode konmsa : "yab-léo.com <http://xn--yab-lo-fva.com> ", sansa "yabos.fr <http://yabos.fr> ".
Mèm si moin lé fyèr mon yabosité é mon pip-léosité, étone pa zot si zot i gingn an rotour in mésaz konmsa : "rasis, ni vé pa !".

Justin