Kan i parl bann lékolozi, la plipar d’tan ou antann dir dé shoz la pa vré san pour san. I di par ébzanp bann moun la i sort déor é sé zot i vé obliz anou viv konm zot.I di ankor : protèz la natir, lé bien protèz la natir, mé kan ou na poin an sifizans pou ou mi oi pa pou kosa ou i sava protèz la natir. I di ankor : alé protèz la natir é kan bann bébète va pouak out prodiksyon, mi pans ou valir zoinal. Poitan la plipar d’tan, lo bann kozman ou i antann sé la kouyonis in poin sé tou ?

Mé la pa sa mi vé anparl zordi. Zordi mi vé anparl lo plan d’ sirvi. Plan d’ sirvi ! Kosa i lé sa ? Sa in plan lété fé isi mèm La Rényon par nout parti, é si mi tronp pa l’ané 1975. Sète ané-la, nout parti la prépar in plan pou dévlop La Rényon épi pou pèrmète nout péi sirviv. Sak na dédan ? Néna tro pou apatrl in pti modékri konmsa, mé sak lé sir sé ké dann liv la néna in gran kantité bone zidé pou amenn lo péi dann shomin dévlopman an bazan dsi dévlopman otosantré é pou pèrmète anou règ lésansyèl problèm néna dann nout péi-avèk konm fil rouj lékolozi !

Mé zami la pa pars nout parti la travaye dsi kékshoz néna 44zané k’i fo pa tienbo kont. Pou koué mi di sa ? Pars nout parti la touzour tash moiyin prévnir pars lé pli préférab prévnir ké guérir. Li la touzour tash moiyin sèye oir lé shoz avan lé zot é mèm tazantan sé li k’lanons dé shoz lé pa intérésan pou nou mé i vo myé oir la vérité é anons ali plito ké fé konmsi nou lé pa la avèk sa… Plan d’sirvi, in plan pou bann rényoné fé par bann rényoné, é in plan lé pli vivan ké zamé.