Shak ané, défoi, pli souvan, gouvèrnman i fé in plan pou ékonomiz larzan déssi l’asirans maladi. Alak madame Bachelot i propoz in nouvo plan : so kou issi, i port déssi kat miliar l’euro... Oté lé ga ! Lavé pa di lané dèrnièr, avèk la franshiz épi lo bann déranboursman, in tralé médikaman l’assirans maladi sar an ékilib dann l’avnir.

Ki fouti lékilib ? Kozé lé bon, mé koz dann vid, la pa bon ! Vik sète ané, nora ankor kat miliar défisit. Alak i di, bann z’assiré sosio i gingn ar pa lo kou so foi issi : Sé bann mutuel va pèy in taks, épi gouvèrnman va ranbours kat san million li doi, li la mète dann son posh.
Oui mé sa i fé pa tousa larzan-la ! Pétète dë miliar, pa plis. Alor, èl i di si la finission son kozman k’va lèv in kotizasion déssi lintérèsman bann salarié, épi déssi la prime partisipassion. Lavé pa di bann travayèr té i sar gonf z’ot pla avèk sa ? La fine oublié don ? Alzeimèr la fine trap aèl ?
I prétan ossi lé riskab lèv in kotizasion déssi bann z’avantaj an nature : biyé lavion bann moun i travay Air France i gingn pou in pti pri, pétète galman bann shèk dézéné.

Zot i konpran lé ga, lé zamé fini avèk sa : sé in shène san fin, kaziman in shène krapo, sé in plan-plan é rataplan. Pandan s’tan-la, kabri i manz salad !

Justin