Oté

Plan pou lé pov ? Sa sé pou la galri. Plan pou rish ? Sa sé lo kèr dé shoz

Justin / 15 séptanm 2018

JPEG - 43.6 ko

Kan in prézidan i amenn in politik séraz sintir bann rotrété, kan li tir larzan dsi l’ède lozman, kan li siprime larzan laksésyon pou la propriyété, kan li tir plis vin mil kontra CES, mi pans li lé mal plasé pou fé in plan pou lite kont la povrété. Ou i pous pa d’moun dan la povrété pou dir ou i sava ansort azot.

Mi parl la pou prézidan La Répiblik bann fransé. Kosa l’ariv ali ankor ? Sinploman ké li té fatigé antann li sé lo prézidan bann rish, mèm bann tré rish, li la désid fé in plan pou lite kont la povrété. Pou fèr kosa ? Pou shanj son l’imaz ? L’èrla, ni kontinyé dann la kominikasyon é ni rant pa vréman dann lo vif di sizé.

Sak mi romark mon par, ké dopi dé z’ané é dé z’ané, shak prézidan i fé in plan pou lite kont la povrété, mé oplis i sava, oplis la mizèr i goumant. Akoz pa in plan kont la rishès, an touléka lo tro d’rishèss dann in bann péi 0,1 pour san la popilasyon i pèrsoi sinkant pour san bann rishèss. Sré myé lite kont la rishèss pétète i pouré ariv a kékshoz.

Oui mé néna dé péi bann minis lé milyardèr, mèm plizyèr foi milyonèr. Alor, étone pa si zot i koné myé bann rish mèm bann sipèrrish ké bann pov ! Etone pa lé pli fasil pou zot fé in plan pou gonf lo pla bann rish ké aranz la sityasion bann pov. Plan pou bann pov ? Sa lé pou la galri. Plan pou rish ? Sé sa lo kèr dé shoz.

NB. Zot i koné la nuite lo kat aout 1789. Dann tan-la an inn nuit la aboli bann privilèz dann La frans l’ansien réjime. Ako pa in nouvo nuite pou l’abolisyon bann privilèj ? Kont dési mé fyé pa tro sof si i arpran ankor in kou la bastille.