Zot i koné, pou nou, rényoné, la sékirité alimantèr, sé kaziman in krédo par raport l’ékonomi rényonèz. La pa promyèr foi ni anparl dé sa é pour sir sar pa lo dèrnyèr foi. Pou kosa mi di sa ? Pars pou in pé isi shé nou i pé plant arienk kann ankor arienk pou fé d’sik. Zot i pé dir néna arienk bann l’éstré i pans konmsa é lo bann progré i fé dann d’ot z’androi, sa sé kékshoz i pé pa konsèrn anou anou. La kouyonis sé in n’afèr énorm isi shé nou !

Poitan, la késtyonn la sékirité alimantèr, ni vé, ni vé pa, sa sé in késtyon k’i intérès anou. Zot i an souvien kan George Bush la parti fé la guèr kont l’Irak ? Ébin dori l’ariv a manké shé nou é in pé plis téi fé la révolisyon dann bann gran sirfas. Zot i souvien néna dé troi z’ané, kan gouvèrnman l’Inde la désid arèt in kou l’ésportasyon Basmati ? Ébin, nou lété pa loin trap la guèr sivil isi.

Fransh vérité nout problèm lé sinp : ni manz dori é ni produi kaziman pa, sof in pti pé mé la pa asé pou nou. Ni vé pa non pli shanj nout manzé d’baz mé ni kroi san pour san ni pé fé pous dori, isi, shé nou. Bien antandi sé in kouyonad ké dir isi i pé pa plant dori ! Isi néna la plas pou so plantaz la. Nana galman lo klima k’i fo é nout tèr rényonèz la pa bon solman konm di sèrtin pou plant maKaroni avèk do sèl. Li lé bien akéyant pou in kantité d’plantaz é nout tout i koné sa.

Arzout èk sa, koméla, néna in gran kantité katégori do ri pou planté é lo rannman lé plizanpli méyèr, mèm san ansèrv l’angré épi dézèrban shimik. Moin la fine anparl lo ri nerica dann l’afrik. Moin la fine anparl galman lo ri SRI dann Madégaskar. Tazantan ni anparl bann varyété do ri plantèr i plant dan La chine é i fé ziska dis tone par éktar. I paré mèm dan La frans, dann La brétagn, koméla i gingn fé pous dori. Sé dir !

Mi antan déza in pé apré grogné. Apré di, akoz i koz pa dsi lo ri i plant Sin-Pyèr, ravine dé kabri ? Akoz i koz pa dsi do ri i plant dann lé o la komine Sin-Pol ? Akoz i parl pa lo ri i plant dann Chaudron Sint-Klotid ? Pars sa osi i égzis é bann plantèr dévoué i travaye la dsi dopi kék tan. Akoz i parl pa mésye Alfred Isautier té i vé lans la kiltir do ri ? Konm d’ot l’avé lans plantaz kann.

Plant do ri La Rényon ? Fransh vérité, sa nou lé kapab !