Mé mwin la fine di mi sava pa anparl de sa, mé mi sava anparl sinploman bande plantèr kann épi zot rovni. Zot i koné zordi lo pri kann pou plantèr lé bazé dsi sak zot néna konm sik-zot rishèss an sik, si zot i vé- épi in pé ossi dsi léstréssité i pé tir dann kann. Aprésa, i azoute dsi lo pri in l’ède épi i fé bien oir bande plantèr zot l’apré viv dsi la boss la sossyété.

Sa sé la lozik inn+inn égal dë.

Bon pou samèm ! Mé, sanb pou mwin, in lozik konmsa lé pa kékshoz de bon. Mi diré pou komanssé, avèk kann i gingn fé in takon produi mé bande zindistriyèl-indistriyèl assisté, ni pé dir- i vé pa lanss azot pou vréman ladan, é sé pou sa, toulézan i gaspiye lo potanssyèl néna dann la prodiksyon bande plantèr La Rényon. Mi diré ankor, bande plantèr lé pou arien ladan, donk sé pa zot k’i doi pèye lo po-kassé, donk zot i doizète péyé pou sak néna an rézèrv dann zot prodikssyon é lé zété shak ané. Woila in promyé shanjman dann lo promyé lékwassion-sak mi di lé pa zist- dann lo inn+inn égal dë.

Astèr si ni di kann, sa i tienbo la tèr é i protèz noute momon nourissyèr konte lo gaspiye kan néna gro-gro plui. Si ni di ankor kann sa i kaptir lo gaz karbonik é par in byé konmsa li pé z’ète konsidéré konm in linstriman pou lite konte lo dérègloman klimatik, zot sar dakor avèk mwin ké bande prodiktèr kann i doizète dédomazé pou lo léfor zot i fé pou protèz la natir é anpèsh a zot fasson lo réhofman klimatik. Toutt pène i mérite son pourkoi é sé pou sa ké bande plantèr i doizète péyé é oila in sanzman an pliss dann noute lékwasison inn+inn lé égal a dë.

Alon in pé pli loin é kan mi parl sa mi oi déza in pé apré bar la route. Mi vé anparl l’agrikiltir bio pars dissi-d’laba i antande in bonpé kritik konte lo plantèr-plantèr polyèr konm in pé i di- mé la pa li i fé larzan dsi son prop tète avèk lo bande zintran éropéin i vande zordi shèr, vèye pa koman. Lèss amwin dir azot mèm dann kann in prodikssyon biolozik lé possib-i fé sa in pé partou akoz pa issi dann noute péi-mé lo sobatkoz i fé arienk komanssé é avèk sa mi panss noute lékwassion inn+inn égal dë é avèk in pé la mazinassion, ni pé ankor pèrfékssyone noute nouvo l’ékwassion.

A bon antandèr, salu !