Médam, Mésyé, La sosyété, kan zot sar fine lir kozman la, sé a zot, pou shoizi, la vi zot i vé améné. La vi sar pa pli long si ou i plèr sansa si ou i ri. In diférans : lo moun i plèr i mazine li lé maléré konm la pyèr, lo moun i ri, mi pans sé lo kontrèr : li pans la vi lé intérésan. Solman oila, lo mond sé lo mond : néna lo zan k’i plèr é néna lo zan k’i ri. Mi rapèl in kréol konm moin : li téi fé l’armé-antansyon l’armé, pa la gèr !- dann in péi d’solèye é troi zèr l’aprémidi, li té apré bate karé an vil. Mé d’apré sak li téi di li téi soufèr in bonpé pars son famiy té loin é zordi ankor li di sa kan mi trouv ali. Li lé éné Zan k’i plèr li va mor zan k’i plèr. Moin pou mon par, moin la fé mon l’armé dann lalmagn é dann in réziman komando : ladan tout kouyonis té bon soidizan pou prépar la gèr. Rozman la gèr la pa arivé é moin la goute shak èr, shak minite, shak ségonn konm in kado la vi téi fé amoin - i fo dir mi aprésyé bonpé la koyonis demoun. Kan mon kamarad va lèv lo pyé, moin osi m’a lèv lo pyé mé m’a kite la vi san rogré. E li moin lé sir li valé s’anplègn avèk Bondyé pou lo mové tan li la pass dsi la tèr. Alé ! Mi kite azot rofléshi la dsi é ni artrouv pli d’van. Sipétadyé !