Oté

« Pléré avan pou ri apré ! »

In kozman pou la rout

Justin / 26 zwin 2019

JPEG - 43.6 ko

Matsh fotbal madam rant la Frans épi Brézil la fini. Lékip La Frans la gagné é lékip Brézl la pèrd. Balon lé ron pou toulmoun : sa sé lo règloman fotbal. Zordi li la done favèr bann fransé. Domin ? Domin sé in n’ot zour. Kan lo matsh té fini bann zournalis la fé koz bann zouère épi shakinn la di son kat ti mo. An parmi l’avé Marta, zouère Brésil, pétète méyèr zouère madam néna ankor zordi é èl la anprofite lo mikro pou lans in apèl bann jenn é pou dir azot sak èl i pans sé la vérité : plèr é soufèr avan pou sourir apré. Kan ou la fine gagné. Sa lé vré pou fotball, lé vré pou zétid, lé vré pou travaye. Finalman lé vré pou la vi èl mèm. Pars, sanm pou moin, la vi sé in lite dopi promyé zour ziska dèrnyé é lé difisil trik (drib si zot i vé) bann problèm la vi.I paré dann désèrtin péi Madégaskar demoun i plèr kan in zanfan lé éné, épi i fé la fète kan vyé moun i mor. Pou nou sré plito lo kontrèr ! Kisa néna rézon, kisa néna tor ? Mi koné pa, mé kan lé konmsa lé konmsa. Alor, mésyé médam la sosyété, si la vi sé in lite, i fo aprann lité é kan ou i gingn, l’èrla ou néna lo droi ri sansa sourir. Mi kite azot pou rofléshi la dsi é ni artrouv pli d’van. Siptadyé !