Nou na bo dire nou néna la tère, noute bande plantèr lé kalifyé, nou lé kapabe fé sak i manke anou zordi. Ala légzanpe luil ! Nou lé pa kapabe plante pistash, ni gingn pa plante bande zoléajineu, nou na pwin koko in pé partou dann la Rényon nou na poin koko ! - Nou néna si tèlman ké laba dann por i kass lo koko étan pti pou pa tonb dsi la tète demoune. Ni gingn pa fé luil ? Mi panss lé pa si tèlman konpliké é lo bande mashine la pa si tèlman shèr [1].

Ni gingn pi fé la kuizine avèk la grèss ! Antouléka ni domande anou kossa i fé avèk dé tone é dé tone la grèss néna an éstoke dann l’abatoir, é pi dann bande lélvaze.

Mézami néna in bon pé d’tan ni anparl lotosifizanss alimantère é ni vé ni vé pa, ni koné i fo ni pass par-la é lé pa lézote lé kapabe roganize sa pou nou. Ni di souvan i fo in volonté rényonèze, in volonté avèk in pouvoir rényoné. Mé pou sa tazantan i fo shoke in pé… Mé ni vé pa shoke bande profitère, ni vé pa shoke bande zésploitèr.

Mon péi bienémé, zordi wi plègn, wi souplègn mé di amwin si zordi i fo ni plère konm Alan Patton téi di dann son roman bonpé d’moune i koné dsu l’Afrique du sud dann tan lo réjime rassist. Lo tan pléré ? Mi panss pa mé plito lo tan rotrouss nout mansh.

Justin