Ziska zordi, nou la pa fé in kont plis k’i an fo avèk bann projé Virapoullé ! Pou kosa ? Pars dabor la plipar d’tan son bann projé i foir. Sé konmsa ké li la promète dopi bèlaz-é- botan in l’otèl l’androi lo park Kolos i lé, in gran lotèl kat-sink zétoil, pyé dann lo siouplé ! M’arète la, pars tout demoun i koné li sé in gran prométèr... Donk, nou la pans i falé pa inkyété. Mé mi kroi nou na tor pars dann son karyèr li la fé tout in kantité mové projé é ziska zordi pèrsone la pa nyabou kasé.

Zordi li souf dann zorèy lo Prézidan, son projé vann dolo Sint-Roz bann katari, apré avoir vouli vann sa bann l’arabi saoudit. L’èr-la, li la parti zigil gouvèrnman épi lo prézidan pou dir sa sé in n’afèr a fèr. Konm lo prézidan li na poin d’ot shoz dann son tèt koméla ké son bann z’anploi d’avnir épi dé -troi brikol konmsa, li la sote dsi la propozisyon Virapoullé konm in shien i sote dsi in zos. Ala ké li di, an piblik, li va mète a l’étid lo projé. Kèl projé ?

Projé dolo Sint-Roz. Zot i koné laba dann pti por dolo in koul an kantité zour konm nuit, pars lo projé l’EDF lé pa ashévé. Pa Ashévé ? Biensir pars so lo - la, li pé anserv ankor dé foi o moins. Inn pou rofé léstrésité kisoi par la métod i apèl lénèrzi osmotik (lénèrji i éné par lo kroizman rant lo salé épi lo plat-moin la fine anparl de sa) kisoi par la métod banna la tiliz dann l’il El Hierro (moin la fine anparl de sa galman-oto sifizan pou lénèrzi) épizapré ansèrv pou lo kourant dann lrjyon l’est épi lo nor-és, pétète osi pou l’irigasion. Mi pans la pa nout lo i jène anou, an kontrèr nou la bien bézoin ali.

Par l’ fète in kamarad la rakont amoin pandan ké Hollande té apré parl projé Virapoullé, in néstan apré dann bann kominiké, i anons koupir d’lo dsi Sint-Mari. Moin lé sir bann sint-mari l’avé poin lo zour-la, la pans Holand i plézant, li malplézant vi k’li lé abityé bann plézantri mové gou.

Justin

NB-In provèrb pou la rout : "gran prométèr pti donèr !". Mi sava fé lo komantèr vi k’sé in kékshoz lé bien pratiké isi La Rényon, konm déor galman.