Potéké, sansa l’ipotéké, mo-la lé dann mon tète é mi pans li égzis pou vréman dann nout lang-in lang vivant, i f opa obliyé !- sof moin la pa trouv ali dann diksyonèr kréol La Rényon. In lérèr ? In Mank ? Mi pé pa dir azot mé pou moin sa i vé dir apopré « andikapé ». Mé sak mi koné é ké lé vré sé k’in bon mésin si li lé kapab amélyor in pé la santé d’moun potéké, i gingn ar pa fé dans ali. Solman konm mi di souvan dé foi, sa in provèrb donk li na la valèr mèm si i parl pa d’médsin, ni d’moun potéké. Sanm pou moin, sa i vé dir sinploman, i fo pa d’mann l’inposib : l’om i pé fé désèrtènn shoz mé li pé kant mèm pa fé tout. Alé ! Mi kite azot rofléshi la dsi é ni artrouv pli d’van. Sipétadyé !