(page 16)

Kan pli d’ kinz milion d’ “non” i rézone an pèrmanans’ dann zorèy sat té vé anvoy de moune labatoir an votan pou le “oui”, mi konpran nana inpé i fini par pèrd la tèt ! !

Agarde Margie Sudre. Son ka i komans’ devien inkiétan. Mi voi pa kont’ ki li la pa an kolèr. Kont’ le sifraz iniversèl, évidaman. Dann son tèt, la pa in vilgèr “vote pasionèl” va détourne son lèspri si le bienfondé la lib’ konkirans’ ! !

Li lé kont le prézidan la Répiblik li-mèm, zordi. Jacques Chirac lé akizé avoir fé le mové shoi pou diriz lo gouvèrnman. Margie Sudre noré préféré Nicolas Sarkozy plito Dominique de Villlepin. Poukoué ? Pou Margie Sudre, le dalon François Hollande i aparé mié armé pou inpoz "in konkirans’ lib é non fosé". É sa, malgré le mésaz anvoyé par pli d’ kinz milion d’ “non” ! ! !

Justin