Kan in péi lé dann in sitiasion difisil konm la not koméla, kan la parti lé séré konm èl i lé, kan nout bann dirizan lé blijé vèy sa konm delé sü d’fë, pou pa kapoté, lé pa rézonab fé sak in moun konm Annette l’apou fé.

In zour li di, sé l’éta ki doi pèy toutt la rout an kornish, i fo pa in péaj in euro lané 2017. Aprésa li di, la pa Ségolène Royal la di sa, sé lï mem la koz la boush rouvèr. Aprésa ankor, li di l’éta i réspèkra pa son signatir. A bon ? Akoz sa ?
Ala so foi issi, li di, i fo li sava Paris pou koz èk Ségolène akoz bann zantiyé i trouv la rénion i gingn tro avèk l’éta. A bon ? Bann zantiyé sé nout zènmi !

Oté ! ga ! Si ou la pa plï for k’sa, si ou la pou rod solman in post dépïté, pran in ropo. Nou, bann rénioné nou konpran pa in jé d’ponp konmsa. Nou vë tout bann rénioné i mèt ansanm pou in bon politik dévlopman dïrabl. Lo péi la bézoin sa l’èr k’i lé. Sa ou konpran pa sa ?
Sirtou, nou la pi bézoin bann dirizan, plï gatèr k’gatèr. Nou la pi bézoin bann sïpèr-gatèr koman ou.

Justin