Mi koné pa si zot i èm konm moin oir lo la rivyèr koulé. Pou komansé, ou na l’inprésyon delo i koul mèm vitès partou. Mé si ou i rogard bien, ou i an apèrsoi la pa konm sa sinploman. Suiv in bout fèy i flot dsi delo ou va oir ! Tazantan li fil an flèsh, tazantan li tourn an ron, li anfons dan lo épi li arsort. Dé foi, li lé koinsé dann in robor avan roprann son kours an dsandan. I ariv osi ké li pik an byang, tout vitès, konmsi li koné pa kèl koté li doi alé. Ni pé di, li suiv in pti kouran dan lo kouran prinsipal, mèm si lé dé i koul pa toultan dann mèm sans.

L’èr-la, mi mazine mon péi La Rényon. In sosyété avèk son bann kontradiksyon. Défoi la kord lé si tèlman tandi ké ou i kroi li lé riskab pété. Mé la kord i kass pa pou vréman. Mi domann amoin pou kosa. Mi domann amoin si rant nou na poin in siman invizib i pèrmèt anou rès ini dann tangaz. Kèl kalité siman ? In sort ni klou ni vis, i apèl nout l’istoir, i apèl galman lo santiman ni fé parti d’in koléktivité. Poitan, nout l’istoir lé kourt é nout zansèt i sort in pé partou, mé tout, shakinn son tour, i dovien Rényoné. Nou la sort la Frans, mé zordi nou lé Rényoné. Nou la sort Madégaskar, Komor, é koméla nou lé Rényoné. Nou la sort l’Inn, nou la sort la Shine, nou la sort ankor in bonpé l’androi épi nou la plonj dann in bin, nou la vni Kréol rényoné.

Bien antandi, nou na d’ote l’idantité suivan nout nasyon, suivan nout rolijyon, suivan nout parkour, nou lé dan in bann ti-kouran i ramèn anou fir-a-mézir dan lo gran kouran nou la anparl tanto-la. Ni fé parti l’Erop, ni fé parti la Frans, ni fé parti l’oséan Indien. Nout ka lé konpliké, mé sé nout ka. Nout ka lé konpliké, mé sé sa nout fyèrté... Mi souvien bann parol in gran pèrsonaz i apèl Robinet de la Serve té i di konmsa, li na dé patri, la Frans épi la koloni, li la batay pou inn é li la vanj pou l’ot. Koméla lé shoz lé in pé pli konpliké, mé sanm pou moin, pli gran parti pou éné La Rényon, sé lo parti rényoné. Biensir !

Justin