Médame zé Méssyé, la sossyété, koze èk mwin sé koze avèk in kouyon mé sé o pyé d’lo mir k’i oi lo masson.

Mézami, mi koné pa bien oziss si mi di kozman-la pou in promyé foi, sansa si mwin la fine di sa avan. Toute fasson, di é rodi la poin pouarproshé pars la pédagoji d’apré sak mi koné sé l’ar pou rodi plizyèr foi mèm zafèr… Par l’fète, pou kossa mi di sa ? Pars kan mon bande zanfan té pti, l’avé in madame té i vèye azoté tan okipé avèk travaye épi la politik. Alor lo pli souvan possib téi done bande marmaye bonbon ka mon madame téi di : « Mémé arète donn pastiye bande marmaye ! » lo mémé téi réponde sak lété marké an-o la é bande zanfan lété kontan, é lo mémé té kontan galman.

Alor zordi mi panss in mémé lé pa la pou done zot pti zanfan in manzé diététik mé in manzé pou kontante lo boujaron é la moral é sé konmsa mi konpran la vi.

Mi kite azot rofléshi la dsi é ni rotrouv pli d’van. Sipétadyé.