Si zot i frékant bann vyé moun é si zot néna zanfan moin lé sir zot i koné kozman moin la mark pou zordi. Zot i koné bann vyé moun La rényon na poin pèrsone lé zantiy konmsa : zot i fé tout pou fé plézir bann marmaye. La pa komans zordi sa ! La komans dopi la nui dé tan . Moin mèm avèk mon bann fratri nou l’avé in granmèr sa lété bon konm in gato domyèl. El téi kass aèl an kat pou fé plézir a nou. Lé vré nou lété pa tro difisil mé kant mèm son gou pou fé plézir anou lé bien la. Mé lo règloman bann paran lété pa touzour lo règloman bann gran manman : pou inn i fo fé plézir, pou l’ot i fo suiv kom k’i fo lo règloman. Inn i donn bonbon, l’ot i di lé pa l’èr pou manzé-va kass l’apéti. Mé bann vyèy pèrsone néna in répons pou sa élo répons sé konm moin la mark an-o la : « Plin an son, plin an farine, sé plin mèm ! ». Alé lité kont in règloman konmsa ou ! Méyèr règloman moin la zamé trouvé. Alé ! Mi kite azot rofléshi la dsi é ni artrouv pli d’van. Sipétadyé.