Médame, Méssyé, la sosyété, koze èk mwin sé koze èk in kouyon mé sé o pyé d’ lo mir k’i oi lo masson. Mézami, d’apré mwin, kozman mwin la marke an – o la sé kozman in granmèr. Bande granmère la plipar d’tan sé dmoune i gate zot ti zanfan-in vré granmère, pars sète lé pli sévère k’la momon la manke son vokassyon gardien d’prizon… Antouléka mwin la konète inn, té pa la granmère pèrsone vi k’èl l’avé poin zanfan, mé i diré èl lété gran-mère in pé toute ti marmaye : toultan èl téi done, toultan èl téi partaz, mèm si èl l’avé poin granshoz. Si néna dë marmaye é in bonbon, èl i kass an dë, si néna troi èl i kass an troi. Mi panss sé èl la di kozman-la dovan mwin : biensir si i baze dsi la diététik pire son kozman lé pa valabe-mé mwin lé sir èl la nouri pliss limazinassion, lo santiman, la tandrèsse bande marmaye la kotoiye aèl k’in diététisyène noré nyabou fé… Tazantan mi panss konm èl mwin ossi é zot ? Alé ! Mi kite azot rofléshi la dsi é ni artrouv pli d’van. Sipétadyé.