Travay plis pou gingn plis : ala in promès lo prézidan La Frans la fé, épi li pans li la tienbo. La désid bann zèr siplémantèr i sava goumant vinn-sink pou san... I koné pa bien kèl rézilta i sava an avoir, mé la mète 8 miliar par koté pou so désizion-la.
Kissa la di La Frans lé an faillite ? Larzan i mank anou ?

Touléka, si lo sèl métod pou gingn plis, sé fé bann z’èr, bann travayèr, zot kanar lé noir ! Akoz sa i vé dir i goumant ar pa bann salèr normal, sansa in pti guine-guine, mé san konpans la goumantasion bann marshandiz.
Dizon, sa in manièr obliz bann travayèr fé lé z’èr : zot lé si tèlman dann malizé koméla !

Mé fé lé z’èr zordi, sé gingn lo kou domin, sansa apré domin, kan laz la rotrète va’ rivé : i kotiz pa la sékirité sosial la-dsi, alor si i fé vréman lé z’èr, i sava pèrd dsi lo salarié... Dizon, mi anpèrd vin éro par moi épi mi viv ankor vin t’an apré an avoir arète travay, mi sava pèrd 4.800 éro. Sa larzan sa pou in pti kolon !

Pou zordi, mi éstop la, mé sa lasé pou moin di : sa in sipèr gob pou bann travayèr ; in sipèr gob pou pèz azot atèr in pé plis ankor, zot épi zot famy.

Justin