Lo minist la vni oir anou akoz nana in bon pé désizion pou pran pou nout dévlopman. Banna la vèy ali konm délé si d’fé pars, si nou nana konfians, nou na méfians galman - in pé la roul anou kari sou d’ri alors ni oubli pa. Kissa la di, pèrsone i rèss arpa déssi l’bor shémin épi lété arienk in kozman la boush rouvèr.
Lé vré zordi, lo bann shif déssi lékonomi, déssi l’anploi, nout volonté an avoir in dévlopman dirab i sava dann la diréksion k’i fo solman ni fé la romark sé nout volonté si lé shoz i éspas konm i pé k’i éspas...Tan mié si l’État i ède anou, si l’Érop i donn anou in koud’min, mé konm Mao té k’i di : « Alon kont déssi nout kapasité » an promié.
Zistoman, nout kapasité i vien firamézir, i ariv arpa an in zour. Ala pou kossa, bann rénioné la si tèlman bézoin lo sosial : si i raz la pinte la dsi, nou lé riskab afayir. Ala pou kossa, kant i parl karantéin-n’ an kotizasion pou gingn in rotrète plin, nou lé trakassé. Konbien d’moun lé kapab an avoir so karantéin-n’an la ? La vi lé konm sigarète, plis i ral déssi, plis i vien kourt. Ou lé fine vié avan an avoir lo tan konprann.

Justin