Yèr midi édmi M. Fontaine la vni dann zoinal télé dsi Rényon promyèr é ankor in foi li la anparl lojman mé sirtou lo mal-lojman é sa é kékshoz i égziss in pé partou dann toute landroi, dann toute komine é opliss i sava, opliss bann problèm lojman i agrav.

Mwin la fine dir bann zémission konmsa lé intéréssan par lo ban késtyon demoune i poz épi la réponss bann zinvité an zénéral lé intéréssan. Néna défoi ni pé d’mande anou dann kèl péini lé. Inn-dé légzanp i pé éklèr in pé noute lantèrn :

In madam i apèl pou dir èl lé lokatère dann in lojman nèv, mé oila dopi k’èl la rante ladan èl la pankor gingn pran la doush pars lo lé pa évakyé par an-ba mé li romonte par an-o épi sa i fé ké son l’apartman lé plin d’lo an in néstan. Donk èl i profèr pa pran la doush ditou… La fote pa d’shanss ? Bin non, sé in ka zénéral é si néna trante zapartman dann limèb, néna trante sal de bin demoune i gingn pa pran in sinp doush.

Lo prézantatèr i poz in késtyon. li di M. Fontaine, kan la promyèr minist la vni la Rényon li la ésplike aèl in ka, — ni pé di trante mil ka. Néna trante mil lozman na poin lokatèr dodan, i pé pa z’ète atribyé. Pou kossa ? Pars néna poin lo bann komodité k’i fo mèm si zot lé a popré nèv. Donk lo prézantatèr i domann si dopi la vizite la sèf gouvèrnman si lé shoz la shanjé. Li réponn la pa shanjé, lé touzour parèye é lo bann million promi ? I di i sava arivé, mé a la vitèss torti.

Astèr méssyé Fontaine la donn in shif i pé fé rofléshi anou : Néna pliss inn santène limèb nèv lé déza indéssan donk i pé pa mète demoune dedan… In késtyon : sa i éspass dann l’Afrik sansa dann Madagaskar ? Non, sa i éspass dann la flèr l’oséan indien i apèl La Rényon é lé pa prévi d’arété toutsuite konmsa.

Biensir la parl ossi bann lozman mankan. I manke in kantité é la pa sète ané nou va ratrapé, la pa l’ané proshène non pli. Si i kontinyé mi panss nou lé pa pou ratrape sa avan in ta avèk in paké d’zané… Poitan in pé partou néna limèb i pouss konm shanpignon… Mé si pou fini konm lojman indéssan, ni pé dir sa i ansèrv ar pa arien… Aprésa, si bann bayèr sossio i ashté bann lojman privé é ké sa i déboush konm nou la fine oir.

A bon antandèr, salu !

Justin