Pars mwin la antande dir lo préfé la désside anpèsh la vante lalkol vintekatrèr d’ran. Zot i koné léfé lalkol dsi demoune issi La Rényon épi in pé partou. Mi antrevoi demoune i pèrde zot self-kontrol épi i kass i briz tanpir k’i pé ziska pétète fèr azot zot mèm lo tor. Antouléka, préfé la désside sa konmsa.

N’arté myé li interdi la kolèr dann lo péi, mé la kolèr konm zot i koné néna bonpé lé fine ramassé é i domann arienk pou li manifèsté. Anpliss dé sa, néna toute sorte sizé d’kolèr, toute sorte sizé d’mékontantman.

Mé ni sorte dann kadre Halloween nou la pars ni rante dann sète in sossyété d’inzistiss, in sossyété d’zinégalité, in sossyété demoune i rotrouv pa zot bien é par la fote in politik améné dopi dé tan zé dé tan.

Fitintan mi rapèl laba Sin-Pol la komine la sèye ranplass Lo Halloween, par la fète Gran-mèr kal mé zot i koné galman linzistiss Gran-mèr kal la soufèr si tèlman èl l’ariv — d’apré la lézann — a tyé toute zanfan vi ké bann zanfan noré fé tyé son pti Kala… Sa téi spass dann in tan l’avé lésklavaz é téi afranshi bann zésklav pti pé par pti pé.

Alor : Halloween, sansa Gran-mèr kal ? Mwin noré anvi dir, ni inn, ni l’ote pars si inn sé l’aliénassion, l’ote lété l’abizman lé z’inn dsi lé zot.

A bon antandèr, salu !

Justin