Matant Zélida la ékrir Justin :
Mon shèr nové, mon spès salté, rouj-de-fon dovan l’étèrnité, mi pans zot i doi z’ète kontan vi ké bann pèrsonèl l’opital piblik la pèrd l’indèks dsi z’ot prime. Dabor pars mi pans zot lé kontan kan d’moun lé an kolèr é pou in kou demoun lé an kolèr pou vréman. Episa dé, zot i pans sa sé in n’afèr i sava zénéralizé konm in bonpé d’moun i di zordi. Pars i prétan dir kan in kékshoz i malkontant bann fonksyonèr, sa i kontant bann dirijan lo parti, mé la pa bézoin an avoir tro konfyans pars talèr, moin lé sir é sèrtin, lo l’administrasyon épi bann parti la droite i mankra pa fé port azot lo shapo. Tok ! Pran sa pou toué !

Justin la fé pou répons :
Mon vyé matant i koz toultan la boush rouvèr, out kozman i rosanm aou bien é na mèm in bonpé demoun i rézone konm ou san alé tro vrifyé sak zot i di : zot osi zot i koz la boush rouvèr.
Pars si mi tronp pa é sa i mérite bien in pikir d’rapèl pou tout sak i pans konm ou é final de kont i oi pa pli loin k’lo boute z’ot né… Mi rapèl konm si lété yèr, Paul Vergès la fé in konférans do prèss éli la signal in n’afèr : li la di désèrtinn z’indèks koréksyon é dsi la vi shèr, l’avé poin in baz légal. L’èrla, li la dmann bann sindika épi sak lété intérésé par lo z’afèr fé z’ot méyèr posib pou fé adopt in tèks dsi so bann késtyon-la. Bann zournalis té la, la bien ékoute nout kamarad é landomin dann zournal lo tit té i port dsi : Paul Vergès kont bann fonksyonèr épi biensir lo lartik l’avé poin arien a oir avèk lo tit mé té lo tit lété bon pou lash bann lou.
La larg lo bann lou pou vréman é nout kamarad épi nout parti la pran pou z’ot grade : nou té in bann jalou, pa kapab fé arien, pa kapab rokonète koman bann fonksyonèr lé itil pou lo péi, étsétéri, étsétéra, la ké lo ra… Astèr, konm dabitid, ni oi nou l’avé rézon. Alor ? Olèrk maltrèt anou konmsa n’arté pa myé suiv bann konsèye nout bann kamarad. Tok ! Pran sa pou ou.