Pou kossa ? Pars kan ou lé toussél, apré rofléshir sansa apréé krir, ou lé dann oute zone konfor mé kan ou lé anparmi wi sorte oute zone konfor épi an mèm tan wi sorte oute gon, konmsi ou lété in porte.

Mi pé done in légzanp mèm si sa l’ariv néna inn-dé zour é sa lété pa dann in vré sobatkoz mé solman dann in léshanj rante kamarade. Kan l’ariv mon tour pou kozé mwin la anparl lo réjime néo-kolonyalist k’i fé ,solon mwin, ké ni fini l’ané san mète noute péi an mode dévlopman. In kamarade la di, li lé fatigué antann parl néo kolonyalism pars pou li si bann rényoné néna larzan téi vé zot noré pu angaj lo péi dsi la voi lo dévlopman.

La pa fé diskission la dsi mé an mwin mèm mwin la panss : pétète lo moune na rézon ; pétète sé mwin k’la rézon, mé fransh vérité a l’èr, la minite, mwin l’avé poin in bon kor d’zidé pou amontr mwin na rézon épi an mèm tan démonte son poinn-vizé… Zordi ni sava pa anparl pliss ké sa mé sa i fé panss amwin in métode bann militan la lang i pratik dopi lontan.

Dopi dé zané zot i sèye amontre lo bon rol lo kréol i pé zoué dann lékol, dann bann média toussala ; mé zot lé pa toussèl si tèlman néna dmoune i panss lo kontrèr d’zot é toultan l’apré férayé lé z’inn konte lé zot ziska ké lopinyon piblik i fini par fé pansh la balanss koté bann militan la lang é bann sondaz i amontr zot néna rézon é plizanpliss rézon.

Mi arète la pou zordi é mi panss zot i konpran oussa ni vé alé, dann kèl shomin i lé noute shomin galizé. Mi panss nou néna intéré konm lo gramoune Desmond Tutu téi di-rode bann bon zarguiman pou amontr nou néna rézon épi lo bann zavèrsèr tor. ;antouléka wala in piste pou nou alé pli loin.

Sof a dir : mi diskite pa avèk in kouyon, mi done ali rézon,.. mé atanssion pars si talèr toulmoune i done lo koutyon rézon lilé riskab an avoir rézon pou toulbon é alor koman va shanj lé shoz ? I shanj ar pa sa lé sir.

A bon antandèr, salu !