Kan promié zanvier la prézanté, la télévision la dmann kamarad Paul kosa li souèt pou lané 2007. Kamarad Paul la kalkil in kou épi la di : La rénion nana la moitié dmoun i viv a pépré bien, épi nana la moitié dmoun i tir lo diab par la ké. Li la pa di sa konmsa, mé moin, moin la konpri sa konmsa. Aprésa li la di i fo fé in nafèr pou dézièm moitié-la.

Mi pans li té fran mem kan li t i koz so soir-la. Kamarad Paul na rézon, plito di foi k’inn. Nout péi lé pti, mé dann pti péi-la, nana la rénion ki ginye épi La rénion ki ginye pa. Koman fé in nafèr bien, solid, dirab, définitif pou La rénion ki ginye pa. Pa pou boush son zié avèk in pti prim, avèk in pti kontra, avèk in pti l’alokasion, fé tourn son tèt avèk in koton lo ronm. Mé, pou mèt ali an lèr, pou k’ li gard son fièrté, pou k’li oi so fièrté dann zié son momon, dann zié son papa, dannzié son madam sansa son bononm, son zanfan.

Shanj lé shoz, sé shanj la vi bann moun La rénion ki ginye pa, avèk in vré travay, in bon moné, in bon boushé manzé, in pti loizir épi lo réspèkt par toulmoun. Justin, ou rèv ? Oui, mi rèv, solman mi préfèr révé plito kroir napoin rien pou fé pou bann moun La rénion ki ginye pa.

Justin