In gouvèrnman, kan li lé modèrn, li kado bann rish épi li fé pèy bann ti-kolon. Nou la fine antrokozé déssi sa. Soman, oplis i sava, oplis i mète anlèr politik-la. Ala éstèr i modifié inn pti pé, zis in pti pé, dann milié la nuite par préférans, lo l’inpo déssi la télé.

In promié kou, i di, so linpo-la I goumant ar pa sèt ané. Bon nouvèl ! soman moin téi koné pa si lété késtionn goumante ali. Sar 116 éro la-ba dann La Frans épi 74 éro dann loutremer... M’a di azot, moin lé fine abitié èk banna, si i di sa, nana in bout la ké i ariv déyèr, wi atann pa.

Ala li-la : i sava siprime tout bann dégrèvman, pou bann vié moun, pou bann èrémi, pou bann handicapé. Pou finir, tout démoun, sak nana in vié kok télé dann son kaz, i fodra li pèy so l’inpo-la*...Mi vé pa donn gouvèrnman inn-dé bon lidé, mé na ankor zafèr pou fé : armète la vignète loto, proférans déssi bann vié pti loto - konmsa mèm va débisk bann ti-kolon - épi lo tinm déssi la kart lidantité, dokiman péyante dann tribinal.

Alé, tir mèm sosis kui dann vant koshon. Nou lé modèrn foutor ! La p’asé, mète ankor ! Karapat, son plas sü tété bèf mèg. Fransh vérité !

*Sa i fé 780.000 ti-kolon.

Justin