Néna in kozman, mi koné pa dann kèl péi i di sa, é moin la mèm fine ékri sa dann Témoignages i di konmsa : « in zèf i bataye pa avèk in rosh ». Pou kosa ? Pars lo rézilta lé koni par avans é lo zèf, konm i di, son poi lé o fé. Parèye pou kozman moin la mark an o la. Biensir marmite an tèr i pé shoke avèk marmite an fèr mé dann in ka konmsa, lo rézilta lé koni par avans. Bien bète sak i fé bataye son marmite an tèr avèk son marmite an fèr ! Mé konm nou na afèr avèk in provèrb i fo ni sèye konète lo sans figiré é sète – la lé sinp a mon avi é si ni vé sa i rozoinn la moral in fab La Fontaine « lo lou avèk l’agno » i di konmsa : « la rézon lo pli for lé touzour lo méyèr. »-alé, mi kite azot rofléshi la dsi é ni artrouv pli d’van. Sipétadyé !