Moin na konm l’inprésion so nouvo prézidan La Frans la déshir la paz son diksionèr ousa lo mo sosial té marké. Konm k’i diré, li lavé pa bézoin so paz-la, akoz li l’avé déza bann paz oussa nana la lèt "A" konm "anti-sosial".
Zot i koné kossa la fé pou lo SMIC, lo RMI, l’AAH, l’API, épi d’ot kalité larzan ? La raz la pinte ! La pankor fini : éstèr, li vé diminié lo bann ti-kontra, koup la tèt inn pou troi : sa i fé in bon pé, 18.000 par-la.

Épi, li vé fini avèk l’ARA. Sa i ansèrv pou ardonn travay demoun la pi boulo.
D’apré li, lo prime pou l’anploi lé assé. La pa bézoin l’ARA, akoz sé topète-pou-morète ansanm lo prime. Soman, kan ou sava bien rogardé, ou apèrsoi l’ARA lé mié pou dmoun. Alor, lo préfé la anons sa, li pran anou pou dmoun boushé, sansa, li-mèm lé boushé ?

Lavé in vié romans, vié mèm, té k’i di konmsa : « La poin bébète konm zabitan*, li pran po d’shanm pou pla kouvèr, li pran makaroni pou la bouzi ». Mi mazine, i pran anou pou zabitan dann tan lontan.
Mé li pé kroir a nou : kan lo tan v’arivé, nou va bouzé ! É pa pou zoué ! Lé près bon, la !

*Dizon, zabitan té i konpran pa sak li té vé pa konprann.

Justin