Dopi lo tan, nou bingn dan la kriz, i wa pa ankor lo bout i prétan é bann doktèr la kriz i san pa ditou koman nou va sort dann basin. Mazinn a ou, si néna i vyinbou pa bingné ? I riskab trouv lo fon, i riskab koulé. Mé zordi, mi domann a mwin si nout tout lé an kriz parèyman, si néna lé andan, si néna lé andéor. Pou kosa mi di sa ? Mi sort lir dann in zournal in létid i koz si la rishèss di mond, si moun rish an zénéral, mi détay pa zot lo létid, nou na pwin lo tan, i di an gro, pou fé kour, i di, dann tan la kriz, dan tout péi, linn a lot, moun rish la ougomanté lo nonm é sirtou zot larzan osi la ougomanté é kontrokou moun pov la ougomanté osi an poundiak, mé par kont zot larzan la diminié, pou in pé la séké minm, boudikont lé in pé fasil pou konprann lo tik-tak vik i raz la pint in pé pou kapot si dot.

Mé dopi lontan, lé konm sa, néna lé minm dovni rish dan la gèr, la profit si la kriz pou fé gonf zot pla. Koz larzan konm sa pou sak na pwin i dovyin in siplis, mé i aminn a mwin dikou si lo prézidan-sénatèr-diréktèr la rényon, si son politik li minn, la politik vwayaz-bat karé. La pou lo kou, i prétan larzan lé kourt, i mankré minm pou fini lo manda. Pou ral a nou ziska lané proshinn li vé dévir larzan té prévi pou larmé. Tiliz larzan larmé, pou kontinié, diss milion de plis pou fé son gèr ziskan domilkinz. Li di partou, li trakass pa, pou li, li va nyabou, vik zot lé mazoritèr o séna é i prétan laba déor banna va èd a li.

Li fé son matador, li fé son fanfaron, mé tousa lé pa ankor fé vik lasanblé va désid la d’si lo 12 désann. Koman i pé fé sa parlfèt ? Mi domann a mwin si lé posib osi. Pou mwin, sé konm in détourman, in larzan k’lé prévi pou la formasyon d’moun, i dwa an sérvi pou sa, ryink pou sa, sirtou pou amontré. An souvyin a zot in gran poèt la di « rouvrir in lékol sé ferm in prizon ». Mé pou désertin, rod pa koman, pourvi ki gingn. Tout manièr lé bon pou gingn zéléksyon. Pou zot lozik a zot fo gingn la gèr, èk larzan larmé lé mié !