Avantièr, moin té dovan mon télé. Smaïn an Harki, la Franss i ar’kit in porsion son listoir. Yèr, navé in dokimantèr dési bann rézistan martiniké, sat la batay kotakot èk de Gaulle. La ankor parlfèt lé doss voir la Franss i vienbou kalkil in ot bout son listoir. Lé bon kan i di pouvréman, tout langazman, tout lo sobatt, bann demoun désou la koloni la fé po débouz in sitiasion, in rokonésans.

Oté, mi sa pa grokèr èk "Momon-là", soman kansa va niabou fé in kont èk tout bann rézistan rénioné ? Po tout sat la fé nout liberté ? Somèn kréol po kozé, la pa in bout gra ou mèt sou mon né. Vin désanm la po rant dann bal. Di pa Vali, son ramadan demoun i koné pa. Talèr Kabaré dan hit parad. Soman i mazine pa bann maron, bann kivi la batay po fagot la liberté. kansa ou’a trouvé in fim dési bann zouav, bann rézistan po La Frans lib, tout bann rénioné la done lo kor po fé flot troi koulèr. La pa po la ont, n’i vé montré. Sa ziss in mémoir la po palanké.

Justin