Sak i nia bou fèr dann d’ot péi, an Frans lé pa possib, parl pa La Rénion : issi lé ankor plis pa possib. La-ba, dan la Suisse oussa dëmoun i koz "bernois", i gingn aprann la lang Alman san ki kontray inn-a-l’ot. I aprann mem lé dë an minm tan. Spandan, bernois avèk alman, sa dë lang lé pa tro loin. La ba, la pa pèr bann marmay i fé zanbrokal la lang dann zot tèt, i may si tèlman k’zot mem lé anmayé d’dan.
Lé vré kan ou fé in amontraj konmsa, i fo ou pran prékossion : ou dëmann bann marmay avèk bann amontrèr épï bann paran, fé travay la tèt. Sansa tanssion déga, mon fra. Na dé foi, bann marmay i vë pï kozé afors zot na linpréssion zot i koz tort. Sansa, bann moun sï la otèr, i panss bann marmay La Rénion lé tro boushé pou fé in jimnastik léspri konmsa.
Pétèt, zot i pans plito, k’i fo lav la tèt bann marmay par anndan, désovaj azot, aprann azot koz konm ki fo,"an fransè s’il vou plé", konmsa zot va oubli zot lé rénioné : in piéd boi, kan son rasine lé koupé, in simp ké siklone i bat alï atèr. Si in moun i anpèrd son lang matèrnèl, lé fasil bat son kïltïr atèr, mèt alï dann laliénassion : po noir, mask blan konm té i di Frantz Fanon.

Justin