Zot va dir mi radot. Zot va dir mi rabash. Zot va dir moin l’apré toultan anparl la mèm shoz. Kosa i lé so shoz-la ? Sa in poin, mi trouv lé inportan dann program parti kominis sé sak i apèl l’otosifizans alimantèr. Osinonsa réponn la késtyon : In péi konm La Rényon – mé sa lé vré pou tout z’il l’oséan indien dan no z’alantour, i pé, sansa i pé pa asir son nésésèr késtyonn manzé ? Donk produir sak i fo pou nouri son popilasyon ? Sa in gran késtyon sa, pars solon ou i réponn par oui, osinonsa par non, nana tout in éstratézi pou trap lo poinn-vizé.

Na poin lontan moin la anparl de ri é moin la di, pars lé vré, ni manz dori, lo onzèr konm lo soir tout l’ané é ni pans ni pé pa s’an pasé. Biensir i fo pa s’an pasé pars sé in bon nouritir. Sak i f osé ésay oir sinout avnir lé asiré, si par ébzanp in zour bann péi i vann anou dori i désid pa arète ésporté pars zot na pi pou zot an sifizans. Na dé-troi z’an, si mi tronp pa, bann z’indien la désid arète ésport z’ot ri basmati. Sa la pa dir lontan mé kant mèm sa i doi z’ète in alèrt po nou.

Tout fason i fo sirtou pa atann nou na pi pou séy konète koman i produi. Sé pou sa, moin pèrsonèl mi èmré i komans san tardé étidyé la plantasyon d’ri bio isi dann la Rényon. Mi èmré bien bann kandida zéléksyon réjyonal i mète sa dann z’ot program, i ède bann shèrchèr pou travay la dsi. Konm di lo kont, sak lé posib Madégaskar, dann l’afrik, dann vietnam épi dann d’ot péi, lé posb isi osi. Nou lé kapab ! Konm té i di défin Madoré, nou la pa z’anfan batar !

NB Ni pé oir lé shoz suivan nout poinn vizé pèrsonèl-in pé i di sa lé nonbrilist-, ni pé oir osi lé shoz solon in éstratézi d’ko-dévlopman.