Mésyé, médam, la sosyété i parétré l’ésport lé fé pou roganiz in bon l’antant rant bann pèp, an parmi bann jenn, é pou rogoumant lo bann pèrformans bann sportif.. Sa lé vré dopi bann zé zolynpik modèrn é d’apré sak i di sak la désid roganiz bann zédézil téi vé kékshoz konmsa pou la zénèss bann zil loséan indien.

Vré, pa vré ? Sa sé in n’afèr i rèss pou oir sa : zot i rapèl dèrnyé zé l’avé fé La Rényion é aprésa téi doi zète lo tour bannzil komor. Mé oila : lo minis éspor La frans la fé konmsi li lété lo shèf ladan-lo gran shèf blan !-, é avèk son gro sabo… Mé zot i ansouvienn sa, donk lé pa itil mi répète sak moin la fine ékri pli d’in foi. Zot i rapèl bannzil komor la désid kite lo bann jé é pou pini azot lo komité la désid lo proshin zé-sète i vienn éspasé par l’fète - sré roganizé par Maurice.

Pou lo bann proshin zé, bannzil komor lété volontèr é la rash ankor in foi z’ot kro. Pou kosa ? I di pars gouvèrnman La frans i vé toultan mète son kiyèr sal dann kari i kui pa pou li. I di osi, olèrk fé zoué la solidarité indianoséanik désèrtin péi la marsh a jnou dovan La frans. I di sa, mé moin lé pa sir mé si sé sa, La frans noré plito du prépar bien konm k’i fo bann zatlète rényoné. I paré té pa lo ka, mé shttt ! silans a l’odyans. Donk proshin kou va fé lo zé dann zil Maldives.

Romark bien nou néna déza la COI, é la pa la solidarité i touf in pé ladan. Mèm bann milyé d’mor rant Anjouan épi Mayotte dann z’ot kwasa-kwasa téi anparl pa tro. Konm i anparl pa lo sor bann shagosien. A ! solidarité, sa in zoli mo sa, mé in trist réalité. In min i lav l’ot ? A lo sal, sa lé sir.