Astèr, sak lé sir, sé ké ni anparl pa poisson pou vréman, ni parl in konstrikssion imène : i pé z’ète léta, sansa i pé z’ète in ladministrassion, ni pé mèm anparl in lantropriz antouléka toute zafèr néna in komannman. Komannman sa i pass par la tète-dizon i pass par lo shèf é si lo shèf i pèrde lotorité lé sir l’afèr i marsh pi. Astèr si ni konpar in konstrikssion imène avèk in poisson sé pars mwin la di azot an-o la sé par la tète ké poisson i pouri.

Koméla ni diré bonpé péi néna problèm pars zot komannman i marsh pa bien é mèm bann kontrol i gaz pa, sirtou si lo bann shèf i suiv pa konm i fo bann règloman normalman fé pou k’lé shoz i marsh. La pa la fote lo moune atèr k’lé shoz i marsh pa, mé plito la fote demoune anlèr donk la fote lo komannman.

Alé ! mi kite azot rofléshir la dsi é ni retrouv pli dvan sipétadyé.

Justin