Médame zé Méssyé, la sossyété koz èk mwin sé koz èk in kouyon, mé sé o pyé d’lo mir k’i wa lo masson.

La tète sa lo morsso lo pli prinssipal dann kor.Dan la tète néna la sèrvèl é la sèrvèl sé sak i komande toute sak ni fé. i di ossi la tripe dé lo dézyèm sèrvo : mi koné pa si lé vré pou d’bon mé mèm si lé vré li sé lo dézyèm pa lo promyé é kan promyé-la lé ataké toute i sava an dékaniyan.

Mézami, lé vré poisson i komanss pouri par la tète é mi panss zot konm mwin la fine fé so léspèryanss-la.Toute fasson in poisson i pouri par la tète li lé danzéré pou manzé. .Sanss prop. Mé sans figuiré dan la sossyété sé toute sak i komande la sossyété pou li marshé. Si lo bande komande lé ataké, toute bande mékanism sossyo-politik i fonkssyone pi konm k’i fo, é la sossyété i sava an dégréné.

Alé ! Mi kite azot rofléshi la dsu é ni artrouv pli d’van.
Sipétadyé.