Mi pans, konm moin, zot i ème tyinbo azot in pé o-kouran déssi l’aktyalité. Mi mazine zot i ème byin konète in pé sak i éspass in pé partou. Si lé konmsa, mi kroi zot i doi komans poz azot késtyon déssi sak i éspass dan la France. Pars, si mi tronp pa, nana kékshoz k’i donn linpréssyon nou lé dann in sorte finn règn, konm banna i di sa. I diré lo pouvoir lé fatigué, li ariv pi fèr fass, é oplis li fors, oplis i ansèrv dé riyin.
Yèr, dann mon modékri, moin la anparl azot inn-dé z’éskandal. In sou-minis la fé pèy 12.000 éro sigar par l’État. In n’ot la gingn in pèrmi pou fé in gran kaz pli gran ké lo règloman i pèrmète. Lo fèyton Bettancourt-Éric Woerth i fini pi : in lépizode par zour... Dalas, ton inivèr inpitoiya-a-blé ! Pou konplète lo tablo, lo pouvoir té i konte déssi l’éspor, déssi lo foutball... Movèz piosh !
Na dé foi lé konmsa. Ou i koné pa pou kossa, mé sé konm in kourann shyass ou i ariv pa anbaré. Ou i tash moiyin, mé ou i gingn pa.
Tansyon, na dé shoz k’i marsh. In légzanp ? La polis la route. In faktèr la gingn in prosé-vèrbal pars li té i amène son vélo in min. Sa la spassé la-ba dann in vil i nonm Rennes. Zis in pti z’afèr pou rodir : lo faktèr lété déssi in pist pou vélo, li la pa lèss la polis passé… épi li lé noir... Na dé foi, konm di lo konte, poisson i pouri par la tète !

 Justin