Mé si pou mwin sa sé in démarch natirèl, mi konstate lo bann télé i anparl pa, ni bann radio — é ki di Témoignages di blak-out pou toute bann moune i di zot lé partizan la libèrté d’ékspréssion. Mèm kan zot propriyétèr lété dann in lalianss avèk parti kominiss kissoi dann la Réjyon, kissoi dann d’ote zassanblé, dann zot média té i anparl pa nout zoinal.

Pou kossa ? Pars li téi anparl pa bann problèm inportan pou la Rényon, pou le Mond ? Poitan si ni lir Témoignages ni apèrssoi bann tème kom Lo dérègloman klimatik i okip in plass inportan. Ni apèrssoi galman la késtyonn bann plantèr kann épi lé zot ébin nout zoinal i anparl. Lo kréol rényoné ? Sa lé inportan sa é bin Témoignages i anparl é souvan défoi li lé toussèl.

Astèr si ni anparl l’ONERC, ni koné Paul vèrgès té lo prézidan sète — afèr-la é toulézan l’Onerc té fé in rapor dsi léta d’la késtyon d’lo dérègloman klimatik mé i paré zamé d’la vi bann télé épi bann radio-sof inn momandoné téi apèl radio corail — la anparl la késtyonn dérègloman épi sak l’avé dann lo bèl rapor l’onerc téi fé.

Kissa i pé dir amwin pou kossa ? Kissa i pé di amwin kissa téi fé préssion pou bayone bann kominiss épi zot média ? Pou kossa in blakaout konmsa ?.. Pétète in zour kan va déklassifyé bann zarchiv nou va oir pou kossa antouka koméla mistèr-mistèr. Mé la libèrté d’ékspréssion néna arien po gagné ladan.

Néna ankor d’ote késtyon dopi dé zané bann kominiss i soulèv sa, mé sa i fé pa parti laktyalité. Koméla néna bann z’APE é in pé i kriye pars sé in vré latanta kont nout ékonomi, mé pou kossa la pa anparl avan ?lé tro tar pou bloké kan la fine fé dann dra.. Zot i kroi pa.

A bon antandèr salu !

Justin