Moin la zamé konprann pou kossa in pé i pans la valèr in moun i diré sé son koulèr... Mi souvien lo tan mon zénès :

Lété lo tan téi parl l’indépandans l’Afrik, la guèr dann l’Indochine, la guèr dann la Corée, épi bann zournal té i ariv in foi d’tan té i anparl bann krime nazi, la mizèr bann noir dann l’Amérik, rasism dann l’Afrique du Sud...

Alor moin té i pans, kossa noré pi ariv mon bann kamarad lékol, bann marmay tout-koulèr, si par kou d’shias, nou l’avé viv dann in péi rasis pou vréman. Kossa noré fé avèk Zozèf, Rolan ron-ron, Zilbèr sak i tonm kriz épi l’ot sak i tonm pa, Edmond Parl-Pa épi Adèl, épi d’ot ankor... moin mèm avèk mon bann famiy an parmi !

Lo tan la passé, mé zordi ankor, kan mi antan i di « malgash », « komor », « kaf », « zorèy », pa an amitié, mé konm in zirman, sé konm si in zépine sapan la fons dann mon pié, épi i mète a bouzé dann la shèr, konm in kouto in malfondé noré pik dann mon kèr rénioné.

Poitan, lavé in boug banna l’apèl ali “Kounta Kinté” pou gougnardé. Demoun Sinte-Sizane la mète ali mèr z’ot komine, la mète ali anlèr pars té li lo méyèr, pars li lavé la konfians demoun. Alor lété in kaf konm li té i di li-mèm « rokoni dovan Bondié ». Lavé Luçay Langenier.

 Justin